Abstract:
სამოქალაქო კოდექსის კომენტარის მიზანს წარმოადგენს სამოქალაქო კოდექსის მუხლების სტრუქტურირებული და სისტემური განხილვა სასამართლო, განსაკუთრებით საქართველოს უზენაესი სასამართლოს პრაქტიკის, იურიდიული ლიტერატურისა და რელევანტური საკანონმდებლო მასალის საფუძველზე.
ავტორებმა მიზნად დაისახეს კომენტარის დაახლოება სამართლებრივ პრაქტიკასთან და მასში სამოქალაქო კოდექსის გამოყენების საკითხების ასახვა. თეორიული დებულებები და დისკუსიები მხოლოდ ამ ასპექტით განიხილება.
სამოქალაქო კოდექსის კომენტარი უმთავრესად განკუთვნილია იურიდიული პროფესიების წარმომადგენელთათვის. როგორც ადვოკატების, მოსამართლეების, ნოტარიუსების, საწარმოს იურისტების, მეცნიერი იურისტების, სამართლისმცოდნეობის სტუდენტების სამაგიდო წიგნი, კომენტარი ცდილობს დაამკვიდროს იურიდიული ენის მაღალი სტანდარტები და განამტკიცოს სამართლებრივ პრაქტიკასა თუ სამართლის მეცნიერებაში აღიარებული იურიდიული ცნებები და ტერმინები. ამავდროულად, კომენტარის ტექსტი გასაგებია არაიურისტებისთვისაც და მათ აძლევს საჭირო ინფორმაციას სამოქალაქო კოდექსის გამოყენების ცალკეულ საკითხებზე. კომენტარის სტრუქტურა და შინაარსი შეესაბამება კომენტარების აღიარებულ სტანდარტებს.
